سیّد سلیمان ندوی
انیسویں صدی کے آخر اور بیسویں صدی کے آغاز میں برصغیر میں کئی نامور شخصیات سامنے آئیں جنہوں نے علمی و ادبی دنیا پر گہرا اثر چھوڑا۔ انہی میں ایک بڑا نام سیّد سلیمان ندوی کا ہے جو اپنی علمی بصیرت، تحقیق، تصنیف اور درس و تدریس کے باعث ہمیشہ یاد رکھے جاتے ہیں۔ آپ کا شمار ان لوگوں میں ہوتا ہے جنہوں نے مدرسوں کی تعلیم حاصل کرنے کے بعد عملی میدان میں قدم رکھا اور بہت جلد علمی حلقوں میں اپنی الگ پہچان بنا لی۔
پیدائش اور ابتدائی تعلیم
سیّد سلیمان ندوی 22 نومبر 1884 کو بہار کی مردم خیز بستی دسنہ (ضلع نالندہ) میں پیدا ہوئے۔ والد کا نام حکیم سیّد ابوالحسن تھا۔ ابتدائی تعلیم اپنے گاؤں اور آس پاس کے علما سے حاصل کی۔ علم کی پیاس نے آپ کو آگے بڑھنے پر مجبور کیا چنانچہ آپ پھلواری شریف اور بعد میں مدرسہ امدادیہ دربھنگہ میں پڑھنے گئے۔ یہیں سے آپ کی علمی بنیاد مضبوط ہوئی اور اعلیٰ تعلیم کا شوق مزید بڑھ گیا۔
اعلیٰ تعلیم اور شبلی نعمانی سے وابستگی
آپ1901ء میں دارالعلوم ندوۃ العلما پہنچے جہاں آپ کو شبلی نعمانی جیسی عظیم شخصیت کی صحبت میسر آئی۔ اس ماحول نے آپ کی فکری اور ادبی صلاحیتوں کو جِلا بخشی۔ آپ نے یہاں مولانا فاروق صاحب جڑیاکوئی سے بھی تعلیم حاصل کی۔ ندوہ میں رہتے ہوئے آپ کی دلچسپی ادب کی طرف بھی بڑھ گئی۔ آپ عبدالحلیم شرر کے ناول اور طلسمِ ہوش ربا جیسی کتابیں پہلے ہی پڑھ چکے تھے، اس لیے ادب کے ذوق کو مزید پھلنے پھولنے کا موقع ملا۔
تحریری سفر کی ابتدا
آپ نے1902 میں پہلا مضمون رسالہ ’الپنچ‘ (پٹنہ) میں “خاتونوں کی تعلیم” کے عنوان سے شائع ہوا۔ اسی سال مخزن، لاہور میں بھی آپ کا مضمون آیا۔ 1903 کے بعد آپ کی نظمیں اور غزلیں مختلف رسالوں میں چھپنے لگیں۔ آپ 1906 میں رسالہ ’الندوہ‘کی ادارت آپ کے حوالے کی گئی جو آپ کے قلمی سفر کا اہم مرحلہ تھا۔
الہلال سے وابستگی اور تدریسی زندگی
آپ1913 میں مولانا ابوالکلام آزاد کے اخبار ’الہلال‘ سے جڑ گئے۔ تاہم وہاں زیادہ عرصہ نہ رہ سکے۔ بعد میں آپ نے پونا کالج میں تدریس شروع کی اور علم پھیلانے کا سلسلہ جاری رکھا۔ اسی دوران شبلی نعمانی کا انتقال ہوا، تو آپ نے تدریسی کام چھوڑ کر دارالمصنفین میں استاد کے ادھورے کاموں کو مکمل کرنے کا بیڑا اٹھایا۔ اس کے ساتھ ساتھ آپ ندوۃ العلما کی ترقی اور بہتری کے لیے بھی کوشش کرتے رہے۔
تصنیفی خدمات اور اہم کتابیں
سیّد سلیمان ندوی کی علمی خدمات بہت وسیع ہیں۔ انہوں نے عربی ادب، تاریخ، اسلامیات، سوانح اور ادبیات میں گراں قدر کام کیا۔ اردو زبان و ادب سے متعلق ان کے اہم مضامین نقوشِ سلیمانی، ہماری زبان کا نام، مضامینِ سلیمان اور مقالاتِ سلیمان میں شامل ہیں۔
’حیاتِ شبلی‘ ان کی مشہور اور اہم کتاب ہے، جس میں انہوں نے شبلی نعمانی کی زندگی اور کارناموں کو مفصل انداز میں پیش کیا۔ شبلی کے خطبات اور مقالات کو انہوں نے آٹھ جلدوں میں مرتب کیا، اور خطوط کو دو جلدوں میں شائع کیا۔ سیرۃ النبی کی پہلی جلد شبلی نعمانی نے لکھی تھی، دوسری جلد ادھوری رہ گئی تھی۔ سیّد سلیمان ندوی نے نہ صرف دوسری جلد مکمل کی بلکہ تیسری، چوتھی، پانچویں اور چھٹی جلد بھی خود تصنیف کیں۔ یہ ان کی اپنے استاد سے محبت اور علمی وفاداری کا روشن ثبوت ہے۔ ان کی مشہور کتابوں میں عرب و ہند کے تعلقات، عربوں کی جہاز رانی، سیرتِ عائشہ، خیام، رحمتِ عالم شامل ہیں۔ لسانیات میں بھی انہوں نے اہم کام کیا اور وہ اردو کے ابتدائی ماہرینِ لسانیات میں شمار ہوتے ہیں۔
انتقال
سیّد سلیمان ندوی کی علمی زندگی مسلسل محنت، تحقیق اور خدمت سے بھرپور تھی۔ مختصر بیماری کے بعد 23 نومبر 1953 کو کراچی میں آپ کا انتقال ہوا۔ ان کی علمی خدمات آج بھی یاد کی جاتی ہیں اور آنے والی نسلوں کے لیے مشعلِ راہ ہیں۔
بعض پرانے لفظوں کی نئی تحقیق کا خلاصہ
زبان انسان کی تہذیب اور اس کی روزمرہ زندگی کا آئینہ ہوتی ہے۔ الفاظ نہ صرف معنی رکھتے ہیں بلکہ اپنے اندر تاریخ، حالات اور معاشرت کے رنگ بھی سمیٹے ہوتے ہیں۔ اسی لیے جب پرانے الفاظ کی تحقیق کی جاتی ہے تو معلوم ہوتا ہے کہ ان کے معنی اور استعمال وقت کے ساتھ کس قدر بدل چکے ہیں۔ زیرِ نظر تحریر میں ایسے ہی چند عام الفاظ کی اصلیت، ان کے ابتدائی معنی اور موجودہ استعمال کی دلچسپ تبدیلیوں کو ظاہر کیا گیا ہے۔
سب سے پہلے ناشتہ کا ذکر آتا ہے جسے مصنف نے دن کا سب سے ضروری کھانا قرار دیا ہے۔ دلچسپ پہلو یہ ہے کہ مختلف زبانوں میں ناشتہ کے لیے بھوک توڑنے کا تصور پایا جاتا ہے۔ عربی میں اسے فطور کہتے ہیں یعنی بھوک کا ٹوٹ جانا جس سے افطار اور افطاری جیسے الفاظ بھی نکلے۔ فارسی میں ناشتہ اس شخص کے لیے کہا جاتا تھا جس نے صبح سے کچھ نہ کھایا ہو، مگر وقت کے ساتھ یہ لفظ اس کھانے کا نام بن گیا جو صبح کو کھایا جاتا ہے۔ اس مثال سے معلوم ہوتا ہے کہ کبھی کبھی لفظ انسان کے لیے ہوتا ہے اور پھر بتدریج چیز کا نام بن جاتا ہے۔
اسی طرح نہار منہ کا لفظ ہے جو عام بول چال میں بہت استعمال ہوتا ہے۔ اس کی اصل فارسی کا لفظ ناہار ہے۔ نا کا مطلب نہیں اور ہار کے معنی غذا کے ہیں یعنی نہیں کھایا ہوا۔ اس سے وہ مشہور ڈش نہاری نکلی جو خاص طور پر دہلی اور لکھنو میں نہار منہ کھائی جاتی ہے۔ اسی بحث سے آہار کا لفظ سامنے آتا ہے جس کے معنی غذا کے بھی ہیں اور اس لئی کے بھی جو کاغذ یا کپڑے کو مضبوط کرنے کے لیے لگائی جاتی ہے۔ جیسے غذا جسم کو طاقت دیتی ہے ویسے ہی یہ لئی کاغذ کو مضبوط بناتی ہے۔
کھانوں میں استعمال ہونے والے الفاظ قلیہ اور قورمہ بھی دلچسپ تحقیق رکھتے ہیں۔ قلیہ کی شکل عربی سے ملتی ہے مگر معنی عربی نہیں۔ عربی میں قَلی بھوننے کو کہتے ہیں، اس سے قلیّہ بن سکتا ہے لیکن ہماری زبان میں قلیہ شوربے والے گوشت کو کہتے ہیں اور بعض جگہ سبزی کے ساتھ بننے والے سالن کو بھی قلیہ کہا جاتا ہے۔ قورمہ ترکی الاصل لفظ معلوم ہوتا ہے مگر ہماری زبان میں اس کا مفہوم اپنا خاص ظاہر اور ذائقہ رکھتا ہے۔
زبان کی تاریخی تبدیلی کا ایک روشن نمونہ لفظ سرخی ہے۔ آج ہم سرخی کو مضمون کے عنوان کے لیے استعمال کرتے ہیں حالانکہ اس کا تعلق اصل میں اس سرخ روشنائی سے ہے جس سے پرانی کتابوں میں باب اور عنوان لکھے جاتے تھے۔ جب چھاپہ خانے آئے اور کتابیں سیاہی سے چھپنے لگیں تو لفظ تو باقی رہا مگر رنگ بدل گیا، اور اب سرخی کسی بھی مضمون یا باب کے عنوان کو کہتے ہیں چاہے وہ سیاہی سے ہی کیوں نہ ہو۔
اسی طرح احدی کا لفظ ہے جو آج سست اور کاہل شخص کے لیے بولا جاتا ہے۔ اس کی اصل اَحَدی ہے جس کے معنی ایک کے ہیں۔ مغل دور میں اَحَدی وہ سپاہی ہوتا تھا جو فوج سے الگ صرف ڈیوڑھی پر پہرہ دیتا تھا۔ وہ زیادہ کام نہ کرتا تھا اکثر پڑا رہتا تھا چنانچہ عوام نے اس لفظ کو کاہل اور سست کے معنی میں استعمال کرنا شروع کر دیا۔ یہ تبدیلی بتاتی ہے کہ عوامی زبان میں الفاظ کس طرح نئے معنی اختیار کر لیتے ہیں۔
آخر میں قلعی کا لفظ آتا ہے جو چمک اور سفیدی کے معنوں میں استعمال ہوتا ہے۔ اس کی اصل عربی لفظ قلع سے ہے جو ایک کان کا نام تھا جہاں سے بہترین رانگا نکلتا تھا۔ اسی رانگے سے برتنوں کو چمکایا جاتا تھا اسی لیے اسے قلعی کرنا کہا گیا۔ بعد میں مکانوں پر چونے سے سفیدی پھیرنا بھی قلعی کہلانے لگا۔ پھر محاورہ بنا کہ اگر کوئی شخص عیب چھپا دے تو قلعی پھیرتا ہے اور اگر عیب ظاہر کر دے تو اس کی قلعی کھول دیتا ہے۔
یہ تمام مثالیں اس حقیقت کو روشن کرتی ہیں کہ زبان مسلسل حرکت اور تبدیلی میں رہتی ہے۔ الفاظ کے معنی وقت، ماحول، ضرورت اور عوامی استعمال کے مطابق بدلتے رہتے ہیں۔ پرانے الفاظ کی نئی تحقیق نہ صرف زبان کی تہہ تک لے جاتی ہے بلکہ ہماری تہذیبی تاریخ کے کئی پہلو بھی سامنے لاتی ہے۔ یہی زبان کی خوبصورتی اور اس کی زندگی کا ثبوت ہے۔
معروضی سوالات
سوال 1 ۔ سیّد سلیمان ندوی کی پیدائش کب ہوئی تھی؟
الف) 21 نومبر 1885
ب) 22 نومبر 1884
ج) 23 نومبر 1883
د) 20 نومبر 1884
جواب ۔ ب) 22 نومبر 1884
سوال 2 ۔ سیّد سلیمان ندوی نے کس شخصیت سے دارالعلوم ندوۃ العلما میں خاص طور پر استفادہ کیا؟
الف) مولانا ابوالکلام آزاد
ب) مولانا حالی
ج) شبلی نعمانی
د) عبدالحلیم شرر
جواب ۔ ج) شبلی نعمانی
سوال 3 ۔ سیّد سلیمان ندوی کا پہلا مضمون کس رسالے میں شائع ہوا؟
الف) الندوہ
ب) الہلال
ج) مخزن
د (الپنچ
جواب ۔ د )الپنچ
سوال 4 ۔ سیرۃ النبی کی پہلی جلد کس نے مکمل کی تھی؟
الف) سیّد سلیمان ندوی
ب) شبلی نعمانی
ج) مولانا آزاد
د) مولانا فاروق جڑیا کوہی
جواب ۔ ب) شبلی نعمانی
سوال 5 ۔ لفظ “فطور” کا مطلب کیا ہے؟
الف) صبح کا کھانا
ب) بھوک توڑنا
ج) پیٹ بھرنا
د) جلدی کھانا
جواب ۔ ب) بھوک توڑنا
سوال 6 ۔ لفظ “ناہار” میں ‘نا’ کا مطلب کیا ہے؟
الف) غذا
ب) لئی
ج) نہیں
د) جلدی
جواب ۔ ج) نہیں
سوال 7 ۔ نہاری کس وقت کھائی جانے والی ڈش ہے؟
الف) دوپہر
ب) رات
ج) شام
د) صبح نہار منہ
جواب ۔ د) صبح نہار منہ
سوال 8 ۔ احدی کس کے لیے بولا جانے لگا؟
الف) بہادر سپاہی
ب) دانا شخص
ج) سست اور کاہل آدمی
د) تیز دوڑنے والا
جواب ۔ ج) سست اور کاہل آدمی
سوال 9 ۔ لفظ “قلعی” اصل میں کس چیز کے لیے استعمال ہوتا تھا؟
الف) کپڑا رنگنے کے لیے
ب) بہترین رانگے کے لیے
ج) لوہے کو تیز کرنے کے لیے
د) لکڑی پالش کرنے کے لیے
جواب ۔ ب) بہترین رانگے کے لیے
سوال 10 ۔ سیّد سلیمان ندوی کا انتقال کب ہوا؟
الف) 22 نومبر 1953
ب) 23 نومبر 1954
ج) 23 نومبر 1953
د) 24 نومبر 1953
جواب ۔ ج) 23 نومبر 1953
آپ بتائیں
سوال 1 ۔ بھوک توڑنے کی اصطلاح کیا ہے؟
جواب ۔ عربی میں فطور بھوک توڑنے کی اصطلاح ہے یعنی وہ چیز جو بھوک توڑ دے۔
سوال 2 ۔ سیّد سلیمان ندوی کتنی زبانوں کے ماہر تھے؟
جواب ۔ سید سلیمان ندوی عربی، اردو اور فارسی زبان جانتے تھے۔
سوال 3 ۔ عربی میں ناشتہ کو کیا کہتے ہیں؟
جواب ۔ عربی میں ناشتہ کو فطور کہتے ہیں۔
سوال 4 ۔ فطور کے معنی بتائیے۔
جواب ۔ فطور کے معنی ہیں توڑنا، یعنی بھوک کو توڑ دینا۔
سوال 5 ۔ لفظ نہار کن دو زبانوں میں استعمال ہوتا ہے؟
جواب ۔ لفظ نہار کی اصل فارسی ہے لیکن اب یہ ہندستانی زبان میں بھی ایسے ہی استعمال ہوتا ہے۔
سوال 6 ۔ قلعی کسی زبان کا لفظ ہے اور اس کے معنی کیا ہیں؟
جواب ۔ قلعی کا لفظ عربی نعتوں میں ملتا ہے اور اس کے معنی ہیں رانگا (جس سے برتنوں پر سپیدی کی جاتی ہے)۔
سوال 7 ۔ سرخی سے کیا مراد ہے؟
جواب ۔ سرخی سے مراد مضمون یا باب کا عنوان ہے۔
سوال 8 ۔ اَحدی اور اَحَدی کے فرق کو واضح کیجیے۔
جواب ۔
اَحَدی کے معنی ہیں ایک اور یہ اس سپاہی کا لقب تھا جو اکیلا ڈیوڑھی پر رہتا تھا۔
اَحدی عوام میں سست اور کاہل کے معنی میں استعمال ہونے لگا۔
سوال 9 ۔ ‘قلعی کھولنا’ اور ‘قلعی پھیرنا’ کے معنی میں کیا فرق ہے؟
جواب ۔ ’’قلعی‘‘ اصل میں وہ سفید مادّہ ہے جو برتنوں یا مکانوں پر پھیرا جاتا ہے تاکہ وہ صاف اور مضبوط لگے۔ زبانِ عام میں اس سے محاوراتی معنی بھی پیدا ہوئے ہیں۔
قلعی پھیرنا کا مطلب ہے کسی داغ، عیب یا خامی کو چھپا دینا۔ جیسے دیوار کی سفید پاشی سے داغ چھپانا یا کسی رپورٹ میں غلطیوں کو چھپا دینا۔ یہ عمل پردہ ڈالنے کے مترادف ہے تاکہ چیز بہتر دکھے۔
اس کے برعکس قلعی کھولنا کا مطلب ہے چھپایا ہوا داغ یا عیب ظاہر کرنا۔ جیسے سفید کی ہوئی دیوار کے نیچے والا داغ دکھ جانا یا کسی شخص کے چھپائے ہوئے کام عوام کے سامنے آ جانا۔ یہ عمل پردہ ہٹانے کے مترادف ہے۔
سوال 10 ۔ قلعی کو عربی اور فارسی میں کیا کہتے ہیں؟
جواب ۔
عربی میں ۔ قلع ایک کان کا نام جس سے اچھا رانگا نکلتا تھا۔
فارسی میں ۔ رانگا۔
سوال 11 ۔ پورب اور پچھّم کی زبانوں سے کون سی زبانیں مصنف مراد لیتا ہے؟
جواب ۔ مصنف پورب کی زبان سے عربی اور پچھم کی زبان سے انگریزی مراد لیتا ہے۔
مختصر گفتگو
سوال 1 ۔ پیٹ کے لیے کھانوں میں سب سے زیادہ ضروری کھانا کون سا ہے؟ اس کے متعلق سید سلیمان ندوی کے خیالات واضح کیجیے۔
جواب ۔
سید سلیمان ندوی کے مطابق ناشتہ پیٹ کے لیے سب سے زیادہ ضروری کھانا ہے۔ وہ کہتے ہیں کہ صبح سویرے کچھ کھا لینے سے پورے دن کے لیے توانائی اور حوصلہ ملتا ہے۔ انہوں نے یہ بھی بتایا کہ مختلف زبانوں میں ناشتہ کو بھوک توڑنے کے معنی میں استعمال کیا جاتا ہے، جیسے عربی میں اسے فطور کہتے ہیں جس کے معنی ہیں بھوک کو توڑنا۔
سوال 2 ۔ ‘قلیہ’ سے کیا مراد ہے؟ اسے عربی اور ہندستانی زبانوں میں کیسے استعمال کرتے ہیں؟
جواب ۔
لفظ قلیہ کا تعلق اصل میں عربی زبان سے ہے۔ عربی میں اس کی شکل قَلیّہ ہوسکتی ہے، اور قَلی کا مطلب ہے بھوننا۔ اس حساب سے عربی میں قلیہ سے مراد بھونے ہوئے گوشت یا کھانے کی وہ چیز ہوتی تھی جسے بھون کر تیار کیا گیا ہو۔ ہندوستانی یا اردو زبان میں اس لفظ کا مطلب تھوڑا بدل گیا۔ یہاں قلیہ عام طور پر شوربہ دار گوشت کے لیے استعمال ہوتا ہے، جس میں سبزیاں یا دیگر ترکاری بھی شامل ہو سکتی ہیں۔ یوں عربی لفظ کے معنی بدل کر ہندستانی زبان میں ایک مخصوص کھانے کی شکل اختیار کر گئے۔ یہ تبدیلی زبان کے تاریخی ارتقاء اور کھانوں کے مقامی انداز کے اثرات کی وجہ سے ہوئی۔ اس طرح لفظ قلیہ عربی کے اصل معنی سے آیا لیکن اردو میں اس نے اپنا خاص استعمال اور مفہوم اختیار کر لیا۔
سوال 3 ۔ نئے اور پرانے نقطہ نگاہ سے لفظ سرخی کے معنی کا جائزہ لیجیے۔
جواب ۔
لفظ سرخی کا مطلب اصل میں کسی مضمون، باب یا عنوان کو امتیازی طور پر دکھانے کے لیے استعمال ہوتا تھا۔
پرانا نقطہ نظر ۔ پہلے زمانے میں کتابیں قلم سے لکھی جاتی تھیں۔ اس میں باب یا عنوان کو نمایاں کرنے کے لیے سرخ رنگ میں لکھا جاتا تھا تاکہ قاری فوراً اسے پہچان سکے۔ یوں سرخی لفظ نے اصل میں رنگ کے لحاظ سے معنی اختیار کیے۔
نیا نقطہ نظر ۔ آج کے دور میں جب چھاپہ خانہ اور سیاہی استعمال ہونے لگی، تو لفظ سرخی اب صرف کسی باب یا مضمون کے عنوان کے لیے کہا جاتا ہے، چاہے وہ سیاہی سے چھپا ہوا ہو یا چھاپہ خانے کے ذریعے چھپا ہو۔ یعنی لفظ سرخی نے رنگ کی نسبت چھوڑ دی اور محض عنوان یا عنوانی حصہ کے معنی اختیار کر لیے۔
سوال 4 ۔ بعض پرانے لفظوں کی نئی تحقیق، سید سلیمان ندوی کی کسی کتاب سے ماخوذ ہے؟
جواب ۔
یہ تحقیق سید سلیمان ندوی کی کتاب بعض پرانے لفظوں کی نئی تحقیق سے ماخوذ ہے جس میں انہوں نے اردو کے بعض پرانے الفاظ کے معنی اور اصل زبان (عربی، فارسی وغیرہ) کے حوالے سے وضاحت دی ہے۔
سوال 5 ۔ سید سلیمان ندوی کے استاد گرامی کا نام بتائیے۔
جواب ۔
سید سلیمان ندوی کے استاد گرامی کا نام شبلی نعمانی تھا۔
سوال 6 ۔ ہماری زبان میں شوربہ دار گوشت کو کیا کہتے ہیں؟
جواب ۔
اردو میں شوربہ دار گوشت کو قلیہ کہتے ہیں جس میں سبزیاں یا دیگر ترکاری بھی شامل ہو سکتی ہیں۔
سوال 7 ۔ سید سلیمان ندوی کی جائے پیدائیش دسنہ بہار کے کسی ضلع میں ہے؟
جواب ۔
سید سلیمان ندوی کی جائے پیدائش دسنہ ہے جو موجودہ وقت میں نالندہ ضلع بہار میں واقع ہے۔
سوال 8 ۔ سید سلیمان ندوی کے پڑھنے لکھنے کا خاص میدان کیا تھا؟
جواب ۔
سید سلیمان ندوی کے پڑھنے لکھنے کے خاص میدان میں شامل تھے ۔
عربی ادب ،اسلامیات ،تاریخ اور سوانح ادبیات اور ترتیب و تدوین اردو زبان و ادب پر مضامین لکھنا، لسانیات پر کام کرنا یعنی وہ ایک جامع ادیب، مصنف اور محقق تھے۔
تفصیلی گفتگو
سوال 1 ۔ ہمارے کھانوں میں ناشتے کی کیا اہمیت ہے؟
جواب ۔
سید سلیمان ندوی کے مطابق ناشتہ کھانے میں سب سے زیادہ ضروری ہے۔ صبح سویرے کچھ کھا لینے سے پورے دن کے لیے توانائی اور حوصلہ ملتا ہے۔ وہ کہتے ہیں کہ ناشتہ انسان کے لیے دن کی ابتدا میں ڈھارس اور طاقت فراہم کرتا ہے۔ مختلف زبانوں میں ناشتہ کے لیے ایک اصطلاح ہے جو بھوک توڑنے کے معنی میں استعمال ہوتی ہے جیسے عربی میں اسے فطور کہتے ہیں۔
سوال 2 ۔ لفظ نہار منہ فارسی اور ہندستانی زبان میں کیسے ایک دوسرے سے متعلق ہیں؟ وضاحت کیجیے۔
جواب ۔
لفظ نہار منہ فارسی زبان سے آیا ہے۔ اس کی جڑ ناہار ہے جس میں نا کا مطلب ہے نفی یعنی نہیں اور ہار کے معنی ہیں خوراک یا غذا۔ اس طرح ناہار کا مطلب ہے وہ شخص جس نے صبح سے کچھ نہ کھایا ہو۔
ہندستانی زبان میں یہ لفظ اسی معنی سے آیا لیکن یہاں اس نے شکل بدل کر ناہاری یا نہاری کے معنی اختیار کیے جو خاص طور پر صبح کے کھانے کے لیے کہا جاتا ہے۔ یوں فارسی اور ہندستانی زبان میں لفظ ایک دوسرے سے جڑا ہوا ہے لیکن ہندستانی میں یہ لفظ کھانے کی چیز کے لیے استعمال ہوتا ہے نہ کہ شخص کے لیے۔
سوال 3 ۔ مختلف زبانوں کی روشنی میں لفظ ‘قلعی’ کا جائزہ لیجیے۔
جواب ۔
لفظ قلعی کا تعلق مختلف زبانوں سے ہے ۔
عربی ۔ اصل لفظ قلع ہے جو ایک کان کے نام سے آیا جس سے اچھا رانگا نکلتا تھا۔
فارسی ۔ رانگے کے لیے استعمال ہوتا ہے جس سے برتنوں یا مکانوں پر سپیدی یا سفید پاشی کی جاتی تھی۔
اردو/ہندستانی ۔ یہاں قلعی کے معنی عام استعمال میں سپیدی یا صفائی کے ہیں اور محاورے میں دو طرح استعمال ہوتا ہے ۔
قلعی پھیرنا ۔ عیب یا داغ چھپانا
قلعی کھولنا ۔ عیب یا داغ ظاہر کرنا
سوال 4 ۔ ‘بعض پرانے لفظوں کی نئی تحقیق’ کے فوائد اپنی زبان میں لکھیے۔
جواب ۔
سید سلیمان ندوی کی کتاب بعض پرانے لفظوں کی نئی تحقیق اردو زبان کے مطالعہ اور تحقیق میں ایک اہم ذریعہ ہے۔ اس کتاب کی سب سے بڑی خوبی یہ ہے کہ یہ پرانے اردو الفاظ کے اصل معنی اور ان کے تاریخی پس منظر کو واضح کرتی ہے۔ بہت سے الفاظ آج کے زمانے میں بدلتے ہوئے استعمال ہوتے ہیں، اور ان کے اصل مفہوم لوگوں کی سمجھ سے دور ہو جاتے ہیں۔ اس کتاب کے ذریعے قارئین کو یہ معلوم ہوتا ہے کہ ہر لفظ کس زبان سے آیا اور اس کا پہلا استعمال کیسے ہوا۔
مثال کے طور پر کتاب میں لفظ نہار منہ کے بارے میں بتایا گیا ہے کہ یہ فارسی کا لفظ ہے اور اس کا مطلب وہ شخص ہے جس نے صبح سے کچھ نہ کھایا ہو۔ اسی طرح لفظ قلعی کی مختلف زبانوں میں اہمیت اور اس کے محاوراتی استعمال کو بھی واضح کیا گیا ہے۔ اس طرح کتاب نہ صرف الفاظ کے اصل معنی بتاتی ہے بلکہ یہ بھی سمجھاتی ہے کہ زبان کس طرح وقت کے ساتھ بدلتی اور ارتقا پذیر ہوتی ہے۔ یہ کتاب زبان کے طالب علم، محقق اور ادب کے شائقین کے لیے بہت مفید ہے۔ اس سے نہ صرف لغوی معلومات حاصل ہوتی ہیں بلکہ اردو زبان کے تاریخی اور ثقافتی پہلو بھی سمجھ میں آتے ہیں۔ کتاب کی مدد سے ہم یہ جان سکتے ہیں کہ کس لفظ کا تعلق عربی یا فارسی سے ہے اور کس طرح یہ لفظ اردو میں اپنا مخصوص مفہوم اختیار کر گیا۔ مزید برآں کتاب اردو کی تحقیق اور مطالعہ میں آسانی پیدا کرتی ہے۔ محققین اور طلبہ نئے اور پرانے الفاظ کے تعلقات کو سمجھ کر اپنی علمی تحریروں میں درست استعمال کر سکتے ہیں۔ اس کے علاوہ، یہ کتاب زبان کی قدامت اور ادب کے فروغ کے لیے بھی ایک قیمتی کام ہے۔
یوں بعض پرانے لفظوں کی نئی تحقیق اردو زبان کے مطالعہ، تحقیق اور علمی ترقی میں ایک لازمی وسیلہ ہے جو ہمیں زبان کی اصل روح اور تاریخی ترقی سے روشناس کراتی ہے۔
سوال 5 ۔ درج ذیل الفاظ سے دو دو محاورے بنائیے۔
آنکھ ۔
الف) ۔ آنکھ کا تارا
ب) ۔ آنکھیں کھولنا
پانی ۔
الف) ۔ پانی سر سے گزرنا
ب) ۔ پانی پھیرنا
قلعی ۔
الف) ۔ قلعی پھیرنا
ب) ۔ قلعی کھولنا
جان ۔
الف) ۔ جان پہ قربان
ب) ۔ جان نکلنا
چھاتی ۔
الف) ۔ چھاتی تاننا
ب) ۔ چھاتی پھڑکنا
سوال 6 ۔ اسم صفت کی تعریف بیان کیجیے اور اس کی قسموں کے نام بتائیے۔
جواب ۔
تعریف ۔ اسم صفت وہ لفظ ہے جو کسی اسم شخص، جانور یا چیز کی خصوصیت، حالت یا وصف بتاتا ہے۔
قسمیں ۔
صفت تفضیلی ۔ کسی چیز کو دوسرے سے زیادہ ظاہر کرنے کے لیے مثال ۔ بڑا، چھوٹا
صفت ثبوتی ۔ کسی چیز کی موجودہ حالت بتانے کے لیے مثال ۔ اچھا، برا
صفت تشبیہی ۔ کسی چیز کو کسی دوسری چیز سے ملانے کے لیے مثال ۔ شیر جیسا بہادر